Serokwezîr Nêçîrvan Barzanî diçe Bexdayê

Bi serokatiya Serokwezîr Nêçîrvan Barzanî şandeka hikûmeta Herêma Kurdistanê serdana Bexdayê dike û parlamenterekî Kurd jî dibêje: ‘’Dê gelek mijar bên yekalîkirin.’‘

Li gor agahiyên BasNewsê, şandeke hikûmeta Herêma Kurdistanê bi serokatiya Serokwezîr Nêçîrvan Barzanî serdana Bexdayê dike. Di vê derbarê de çavkaniyeke agahdar ji BasNewsê re got: ‘’Di vê serdanê de Berdevkê Hikûmeta Kurdistanê Sefîn Dizeyî, Wezîrê Navxwe Kerîm Sincarî, Wezîrê Çavkaniyên Xwezayî Aştî Hewramî û Nûnerê Serokê Herêma Kurdistanê Azad Mela Fendî di nav şandê de cîh digirin.’‘

Derheqa armanca serdanê de jî heman çavkanî wiha axifî: ‘’Di civînên Bexdayê de gotûbêj li ser pênc xalan tên kirin. Yekem; Hikûmeta İraqê pêbendbûna xwe nîşan bide li ser cîbicîkirina sozên xwe di hundirhe sê mehan de. Duyem; Pirsa şandina butçeya Kurdistanê û meaşê fermanberan nebe karteke siyasî. Sêyem; Butçeya 2014’ê bikeve bernameyê kar ê Parlamentoya İraqê û deng li ser bê dayîn. Çarem; Meseleya ewlekariya İraqê û sînorên Herêma Kurdistanê. Pêncem jî; Pişka Kurdan di hikûmeta Heyder Ebadî de.’‘

Di vê derbarê de Endamê Şanda Danûstandinan a Kurdistanê Zana Rostayî ji BasNewsê re got: ‘’Serokwezîr û şandeke hikûmeta Kurdistanê serdana Bexdayê dikin, lê dema serdanê heta niha nayê zanîn. Herwiha ew hemû pirs û mesele tên gotûbêj kirin ku di navbera Hewlêr û Bexdayê de bûne pirsgirêk û nehatine çareserkirin.’‘